16 may. 2018

O 7 DE XULLO QUIROGA CELEBRA A III NIGHT TRAIL QUIROGA


A  terceira  Night  Trail  Quiroga  xa ten data, será o sábado 7 de xullo ás dez e media da noite.

A carreira e andaina nocturna que se leva celebrando dende o 2016 volve contar  nesta nova edición  con  tres distancias:
A andaina e trail de 10kms, a de 17 kms ( andaina e trail) e a de 25 kms  só trail. 


Os interesados en participar poden realizar as inscripcións na web ChampionChip Norte, de xeito presencial no Concello de Quiroga (en horario de 10 h a 14 h de luns a venres) ou vía fax (entregando unha copia dá transferencia bancaria).

Os  atletas menores de 18 anos precisan autorización ou acompañamento dos país ou titores. Dende a organización deste evento queren lembrar que os  primeiros 200 corredores que se inscriban  recibirán unha luz  frontal con pilas (excepto na andaina) e camiseta técnica. Cando se esgoten os 200 frontais, todos os inscritos recibirán unha camiseta técnica. 



ABERTO O PRAZO PARA PARTICIPAR NA IV MARCHA CICLOTURISTA RED BOI QUIROGA-CAUREL


    O Departamento de Deportes do Concello de Quiroga  organiza a IV Marcha Cicloturista  Red  Boi  Quiroga- Caurel,  para o domingo 3 de xuño e recorrerá as espectaculares montañas de Courel e Quiroga, un recorrido que non deixará indiferente a ninguén. As inscripcións xa están abertas e os interesados en participar neste proba pódenas facer na páxina www.championchipnorte.com, tendo de prazo ata o día 31 de maio as doce da noite.

     A  marcha está aberta a todo ciclista maior de 16 anos, e o importe da inscripción ascende a 12 euros, sendo obrigatorio o uso de casco protector.
 A saída está prevista para as nove da mañá dende as inmediacións da praza España, onde tamén se fará efectiva a recollida de dorsais entre as oito da mañá e as nove menos cuarto.

     Os participantes farán un recorrido de 97 km. Tras a saída dirixiranse pola rúa Real ata o Paseo Fluvial, para cruzar novamente a rúa Real en dirección a estrada do Caurel, pasando pola Hermida, Campodola, O alto do Boi, Folgoso, Seoane, A Seara Outeiro, Fisteus, A Ribeira, Os Novaes e San Clodio para rematar novamente no punto de saída.
         
     Durante o recorrido estarán instalados 2 puntos de avituallamento. Á finalización da Marcha servirase unha comida a todos os participantes, que tamén recibirán unha camiseta como recordo da proba.

O CONCELLO ORGANIZA DIFERENTES ACTOS CO GALLO DO DÍA DAS LETRAS GALEGAS


       O Concello de Quiroga,  organizou para o17 de maio, Día das Letras Galegas, os seguintes actos:
                             
      Ás 12:30 h, no Concello,  terá lugar a entrega de premios aos gañadores do Certame de Narración e Debuxo Letras Galegas, 2018, na súa fase local convocado pola Biblioteca Pública Municipal e na súa fase provincial pola Biblioteca Nodal de Lugo coa colaboración  da Consellería de Cultura da Xunta de Galicia.

                     
     Trala entrega destes premios, a unha do mediodía e no  Salón de Sesións do Concello , comezará  o Acto Solemne de Nomeamento de  Filla  Adoptiva de Quiroga  á Sra. Dª. Celia Díaz Núñez, escritora galega nacida no Páramo   pero que aos poucos anos se trasladaba  a vivir a Quiroga, a terra da súa nai.

    Celia é licenciada en Filoloxía Galego-Portuguesa e Filoloxía Hispánica pola Universidade de Santiago de Compostela; e tamén diplomada en Maxisterio pala Escola Universitaria de Formación do Profesorado de Lugo.Na actualidade reside en  Ourense, onde exerce como profesora de lingua e literatura galega en ensino secundario.

     Como escritora posúe unha extensa carreira literaria, cultivando xéneros  como o teatro, o ensaio ou a novela; tamén, é autora de libros de texto de lingua galega de educación secundaria.
     O pasado ano   presentou  a súa última novela "Unha verdade amarga", editada pola editorial Galaxia.

    Pola súa dilatada e gran carreira literaria conta con varios premios literarios: Foi gañadora do Premio Pura e Dora Vázquez na 1ª e 9ª edición coas obras “Adeliña”  e “Rugando” (publicadas en 2004 e 2012, respectivamente). Tamén  gañou o II Premio Internacional Barriga Verde de textos para teatro de monicreques coo obra “Cataventos e Cía”.

    Pola súa relación con Quiroga moitas das súas obras están ambientadas en aquí: "Rugando" (narrativa) 2012; "A boca do monte" (narrativa) 2016; "Voces da Terra. Quiroga e os seus escritores" (ensaio) 1995;
                     
      E tras o acto solemne, todos os presentes sairán as portas da Casa do Concello onde dará comezo a actuación  Grupo de Gaitas local “O Recanto”.

4 may. 2018

OS MONTES DA CONCHADA ENTRAN NUN PROXECTO PILOTO PARA PLANTAR OLIVEIRAS


O alcalde de Quiroga , Julio Alvarez, recibiu na Casa Consistorial  de Quiroga, ao Subdirector  de  Mobilidade do Banco de Terras de Agader, Alejandro Ignacio Sánchez  de  Dios, o Secretario  Xeral  de  Agader, Severino Alvarez Monteserín, e un técnico da dirección de Agader. O motivo desta xuntanza foi unha primeira toma de contacto para estudar a viabilidade de levar a cabo un proxecto piloto en Quiroga dentro do programa "Propiedade, mobilidade de terras e valorización territorial", que impulsan a Fundación e a Axencia Galega de Desenvolvemento Rural (AGADER) en colaboración coa Universidade de Santiago.

O proxecto de investigación "Propiedade, mobilidade da terra e valorización territorial" ten por  obxectivo loitar contra o abandono poñendo en valor terras cultivadas que foron abandonadas voltando a poñelas en producción.

O proxecto piloto que se pretende levar a cabo en Quiroga centraríase nas terras que pertencen á Mancomunidade de Montes da Conchada, onde se traballa sobre a posibilidade de plantar nelas oliveiras como primeira opción e en segundo lugar a creación de viñedo.

Tras a xuntanza na casa do concello, os participantes desprazáronse ata a zona onde se podería levar a cabo este proxecto para o que se dispón dunhas 400 hectáreas de terreo. O subdirector de movilidade de Terras, Alejandro Ignacio Sánchez, amosábase moi optimista tras esta visita que se realizou antes de concretar os traballos a levar a cabo.

A partir da vindeira semana comezarase a traballar neste proxecto coa delimitación da propiedade dispoñible e estudando a potencialidade do proxecto.

28 abr. 2018

CATA DOS ACEITES PARTICIPANTES NA XVII MOSTRA DO ACEITE DE QUIROGA NO MUÍÑO DE BENDILLÓ.


O venres, día 11 de maio de 2018, ás 19:00 h na sala de catas do Museo Etnográfico Municipal de Quiroga, terá lugar a cata dos seis aceites inscritos para participar na XVIII MOSTRA DO ACEITE DE QUIROGA, que terá lugar o vindeiro  20 de maio de 2018.
A cata é aberta ao público en xeral que desexe participar como espectador.

Un grupo integrado por catadores de Quiroga, formados nun curso impartido pola UNED de Ponferrada durante o ano 2013, probará os aceites que concorren a mostra igual que se fai na Feira do Viño de Quiroga cos viños aspirantes,  para avaliar a calidade do produto que se porá a venda.

Ademais desta cata os seis aceites que aspiran a participar na mostra analizáronse nun laboratorio especializado onde se lle efectuaron as probas especificadas marcadas pola normativa europea para este tipo de produtos (REGLAMENTO (CE) Nº 1989/2003 DE LA COMISIÓN de 6 de noviembre de 2003, relativo a las características de los aceites de oliva y de los aceites de orujo de oliva y sobre sus métodos de análisis). 

O propio día da mostra, 20 de maio, a comisión de cata reunirase novamente no propio recinto feiral para probar de novo os aceites expostos nunha cata pública e comentada na Capela das Farrapas, ao carón do muíño de aceite de Bendilló.

VII CURSO DE TECIDO TRADICIONAL



O Concello de Quiroga realiza nas instalacións do Museo Etnográfico Municipal de Quiroga o VII curso de tecido tradicional.

Aproveitando a recollida e restauración das pezas empregadas no sector téxtil, levada a cabo dende o ano 2007, ofrécese a posibilidade de aprender os segredos dunha técnica milenaria de forte raizame na zona e que co paso do tempo foi quedando no esquecemento.

O curso, de 20 horas de duración, será impartido pola tecedeira de Visuña Carme Barreiro Díaz. Durante as 20 horas que durará a actividade realizaranse prácticas para familiarizarse coas técnicas milenarias de urdir o fío para configurar a base sobre a que se tece, preparar o fío para tecer (cardar, fiar ao fuso e á roca, torcer, etc) e preparar os flocos para decorar as distintas pezas.

            A data prevista de inicio é o día 10 de maio e desenvolverase dende esta data ata o día 11 de xuño, todos os luns e xoves de 17:00 a 19:00 horas.
            O prazo para anotarse neste curso está aberto ata o propio día 10 de maio, as persoas interesadas poden realizar a súa inscrición ou informarse na Casa de Cultura de Quiroga (teléfono 982435125).



O CONCELLO DE QUIROGA NOMEARÁ FILLA ADOPTIVA DE QUIROGA A CELIA DÍAZ NÚÑEZ


O Concello de Quiroga nomeará Filla Adoptiva de Quiroga a Celia  Díaz  Núñez, escritora  galega nacida no Páramo pero que aos poucos anos trasladouse a vivir a Quiroga, terra da súa nai.
Celia é licenciada en Filoloxía Galego-Portuguesa e Filoloxía Hispánica pola Universidade de Santiago de Compostela; e tamén diplomada en Maxisterio pala Escala Universitaria de Formación do Profesorado de Lugo. Reside en  Ourense, onde exerce como profesora de lingua e literatura galega en ensino secundario.

Como escritora posúe unha extensa carreira literaria, cultivando xéneros  como o teatro, o ensaio ou a novela; tamén, é autora de libros de texto de lingua galega de educación secundaria.  O pasado ano   presentou  a súa última novela "Unha verdade amarga", editada para editorial Galaxia.

Pola súa dilatada e gran carreira literaria conta con varios premios literarios: Foi gañadora do Premio Pura e Dora Vázquez na 1ª e 9ª edición coas obras “Adeliña”  e “Rugando” (publicadas en 20054 e 2012, respectivamente). Tamén  gañou o II Premio Internacional Barriga Verde de textos para teatro de monicreques coa  obra “Cataventos e Cía”.

 Pola súa relación con Quiroga moitas das súas obras están ambientadas en aquí:
"Voces da Terra. Quiroga e os seus escritores" 1995; "Rugando"  2012; "A boca do monte"  2016.
O acto terá lugar o xoves  día 17 de maio, Día das Letras Galegas, no Salón se Sesións do Concello de Quiroga a unha do mediodía.